Емтихан қалай өткізіледі? Мерзімі

Емтихан 2 кезеңнен тұрады. Өту уақыты 1-кезең сәуір, 2-кезең мамыр айы. Тапсыру түрі - кешенді тестілеу.

Емтиханға қай сынып оқушылары қатыса алады?

Қабылдау емтиханына ағымдағы жылы 6-сыныпта оқып жатырған ер балалар қатыса алады.

Емтихан қай пәндерден өтеді?

1-кезеңде:

60 сұрақтан тұрады: математика-логика — 40 сұрақ, қазақ тілі — 10 сұрақ, қазақстан тарихы — 10 сұрақ.

2-кезеңде:

75 сұрақтан тұрады: математика-логика — 55 сұрақ, қазақ тілі — 10 сұрақ, қазақстан тарихы — 10 сұрақ.

Қажетті құжаттар қандай?

Қабылдау емтиханына қатысу үшін үміткер ата-анасы өтініш толтырады және үміткер ЖСН, туу туралы куәлік көшірмесін алып келіп, тіркелуі қажет.

2-кезеңге өту үшін қанша ұпай жинау қажет?

2-кезеңге өту үшін межелік (проходной) ұпай белгіленбеген. 2-кезеңге ұпайы ең жоғары 100-110 оқушы алынады. Алғашқы 100-110-дыққа кіре алмаған оқушы 2-турға өте алмайды.

Лицейге қанша оқушы қабылданады?

2-кезеңнін нәтижесі бойынша лицейге 2 сынып қабылданады, әр сыныпта 24 оқушыдан 48 оқушы.

1-кезең бойынша апелляция жасауға бола ма?

Иә, емтихан нәтижесі шыққаннан кейін 1 күн ішінде апелляция жасауға өтініш беруге болады. Өтініш берген соң 2 күн ішінде сізге нәтижесін хабарлаймыз.

Апелляцияда нелер қарастырылады?

Апелляцияда сіздерге үміткердің жауап парағы көрсетіледі. Ал сұрақ кітапшасы КӨРСЕТІЛМЕЙДІ. Сұрақ кітапшасы — сұрақтар жазылған кітапша. Жауап парағы — үміткер жауаптарын белгілеген қызыл парақша.

Апелляциялық комиссияға төмендегі сұрақтар бойынша шағым қабылданбайды:

1) Кешенді тестілеу тапсырмаларының мазмұны мен құрылымы бойынша;

2) Кешенді тестілеу тапсырмаларын орындау кезінде Үміткердің талап етілген жалпыға бірдей міндетті тәртіп ережелерін бұзуына байланысты;

3) Кешенді тестілеу кезінде Үміткердiң Жауап парағының бланкілерін дұрыс толтырмаған жағдайда.

Емтиханды кім құрастырған және қалай тексеріледі?

Оқушыларды қабылдауды ұйымдастыру және түсу емтихандарын өткізу мақсатында орталық қабылдау комиссиясын Қазақстан Республикасы Білім және ғылым министрлігі мен «Білім-инновация» Халықаралық қоры арасындағы «Білім-инновация» лицейлерінің білім беру саласындағы ынтымақтастығы туралы МЕМОРАНДУМ (01.02.2017ж.) аясында әрекет ететін «Білім-инновация» Халықаралық Қоғамдық Қоры белгілейді. Үміткерлерден құжаттарды қабылдау процесі «Білім-инновация» Халықаралық қоғамдық қоры Президентінің бұйрығымен саны — 7 (жеті) адам, Қор басшылығы, әдіскерлер және Қор мамандарынан тұратын Орталық қабылдау комиссиясы құрылады. Осы комиссия сұрақтарды құрастырады және тексереді. Емтиханды құрастыру және тексеру процесіне Дарынды балаларға арналған Жылыолй лицей-интернаты араласпайды.

Табельді, бағаларды қарайсыздар ма?

Жоқ, 2-кезеңде тек қана тест нәтижесі бойынша алынады.